Магчымасці

Шукаем SMM-мэнаджара/ку, які(ая) будзе клапаціцца пра сацсеткі і развіваць кам’юніці вакол нашых праектаў. Наш кінафестываль і анлайн-кінатэатр — гэта пра кіно, якое хочацца глядзець і перажываць, а не проста «спажываць». З намі ты апынешся ў цэнтры кінаіндустрыі і зразумееш, як усё працуе знутры. Дасылай сваё рэзюмэ, спасылкі на твае адкрытыя сацыяльныя сеткі і некалькі словаў пра тое, чаму табе хочацца далучыцца да нашых праектаў на volia@northernlightsff.com як мага хутчэй, мы хочам пачаць выпрабавальны тэрмін ужо ў траўні!

«Паўночнае ззянне» прымае заяўкі на ўдзел у Беларускім конкурсе. Нягледзячы ні на што, сучаснае беларускае кіно існуе: разважае пра мінулае і шукае адказы, дапамагае зразумець, хто мы, фантазуе пра будучыню. Пяты год запар мы збіраем у Беларускім конкурсе новае таленавітае сваё кіно. Сёлета мы шукаем фільмы, зробленыя беларусамі і беларускамі ў 2023-2024 гадах у любой краіне і ў любым жанры — дакументальныя, ігравыя, гібрыдныя, анімацыйныя, кароткаметражныя ці поўнаметражныя. Прыміце да ўвагі, што калі ваш фільм будзе адабраны для ўдзелу, наяўнасць ангельскіх субтытраў абавязковая.